Song 6 | KYG | STEP | Alagepa kanale a kanomo mai'neka muki a'ne anaga'mo ago aeka apakase'nana a kanomogae, hu'a, Kahau kayamopafi'mo kahau'niya vekamo haiyategamo uno mai'niye. Lagaemo kagae'e'mo magokepi lokaeta kahauya huta agesunafe'mo haiya kate'mo u'niye, hu'a afi ge'nae.

Song of Solomon 6

1 Alagepa kanale a kanomo mai'neka muki a'ne anaga'mo ago aeka apakase'nana a kanomogae, hu'a, Kahau kayamopafi'mo kahau'niya vekamo haiyategamo uno mai'niye. Lagaemo kagae'e'mo magokepi lokaeta kahauya huta agesunafe'mo haiya kate'mo u'niye, hu'a afi ge'nae. 2 Nahau nayamopafi'mo ne'nahaiya veka'nimo hoya'afi'mo uno mai'niye. Agaemo sipisipi anaga'amo hoya'afati'mo nesayafe'mo apavalelino u'niye. Agaemo kanale yaveyave kahau ausemo alino anupa huno malesiyafe'mo hoya'afi'mo uno mai'niye. 3 Nahau nayamopafi'mo nahau'niya vekamo nagai'ni veka'nimo mai'nige'na agai'a a'amo mai'nove. Agaemo sipisipi anaga'amo apavalelino u'nige'a kanale yaveyave kahaumo'mo ausemo he'niya folagapati'mo kahaumo ne'nae, huno hapa pai'niye.

4 Nahau nayamopafi'mo ne'nahaiya a'nimogae, huno, vae, kanale taonimo Tilisi taonigana huka mai'nane. Kanale taonimo Yulusalemu taonigana huka mai'nane. Asole ati vaya'mogimo asole kalahau'me'mo alini'a ne'vage'a apakete'apae'mo hapau ne'aiya asole ati vayakana huka mai'nane. 5 Aulu nahaeka o'nago. Kaulagamo'mo ago aeno nagase'nige'na kagaefe'mo ne'nahaiye. Kayoka'mo'a meme anaga'mogi Gileyati avelegati'mo magokepi nelamiya meme anaga'ai apayokakana huno hane'niye. 6 Muki kave'akamo'mo yaveyave sipisipi anaga'mo hemenimo ani'mo fale'a apate'nageno'ae'mo apayoka'mo'a yaveyave'age'mo nehiya kava huno kave'mo'a yaveyave'age'mo nehiye. Mani muki sipisipi anaga'mogimo lago'ya apana'aumo male'nae. Mago anamo sipisipimo o'mai'nae. 7 Kayoka'mo'a kagesa aepale'mo aino ati kae'niya kagesa aepamo'mo mago yosamo agi'amo pamagalanati yosa alagamo aino apalo ati'niya yosa alagagana huno hane'niye.

8 Kini vekamo a'ne anaga'mo asole a'ne anaga'mo mai'nae. Sigisiti'a kuvini a'ne anaga'mo maige henaga a'ne anaga'amo eiti'amo maige lekana opaisuna agufa alu a'mafa'ne anaga'mo ali'niya a'ne anaga'amo maige hu'a mai'nae. 9 Mai'naya'monanafa kaugo'yave nama'nimo'a aeno apakaseno haino hapai'niye. Asole a'ne anaga'mo mai'naya'monanafa a'nimo magoke'age'mo mai'niye. Ita'amo'mo magoke a'mafa'ne'amo mai'niye. Alino ate'niya ita'amo'mo, hogote a'mafa'ne'nimo mai'niye, huno agesamo afi'niye. Muki a'mafa'ne anaga'mogi agete'apae'mo hao ke he'nae. Kuvini a'ne anaga'mogi'e kini vekamo alu a'ne anaga'amogi'e'mo agi'ale'mo ali'a asaga hu'a ate'nae.

10 Aulu ne'nahaeya a kanomo ina la'ae. Kaimo'a alagepa huno aeno ha lege yegemo'a alagepa huno aeno ha lege huno aeno ha neleya kava huno aulu ne'nahae. Asole ati vaya'mogimo asole kalahau'me'mo alini'a ne'vage'a apakete'apae'mo hapau ne'aiya ati vayakana huno mai'niye, huno hapa pai'niye.

11 Nagaemo kago'mufilagati'mo ne'aeya yosa alagamo agesuvafe'mo lami'na alagepa yosamo'mo alagamo ne'aeya yosa hoyafi'mo mai'nove. Nofi'mo alagepa huno hane'nifi pamagalanati yosamo'a ause he'nifi hu'na agesuvafe'mo lami'nove. 12 Nagesamo o'afi'nogeno'ae'mo malage huno nagupi mafa'nemo'a alino he tino nate'nige'na ali'na namalagite'nae'mo visuvafe'mo nehuve. Hapau'nisiya vaya'nilefe'mo hosimo'mo halaulino ne'viya talalagana huno alino ha maleno nate'niye, huno hu'niye. 13 Yulusalemu a kanomogae, hu'a, Aika atagi neka eno. Kagaemo atagi neka egetao lagaemo kageno, hu'a ha pai'nae.

Yulusalemu a kanomo agesayana na agufa a kanomo agegae. Agaemo lole nofi ati vayakana huno mai'niya a kanomo agegae, huno hapa pai'niye.